«Affers da famiglia»

En «Affers da famiglia» raquinta l’autura Gianna Duschletta da Seraina che chatta durant ina gita ina bulscha che cuntegna ina fotografia veglia d’in mat. La giuvna vegn a savair che quai è Marco, il giuven paster da l’Alp Arpiglia. Ma sin la fotografia è da vesair l’Alp Belvair ch’è arsa giu avant tschintg onns. Al lieu d’incendi avev’ins chattà quella giada bancnotas d’in assagl d’ina banca a Samedan che n’è mai vegnì sclerì. Anc pli misterius è però che la bulscha tutgava al chanzlist da S-chanf, disgrazià sut circumstanzas dubiusas. Ina casualitad? Seraina e Marco cumenzan ad investigar. Dapli ch’els chattan or, pli confus ch’ils scumbigls famigliars daventan…

En ses emprim crimi per giuvenils, che divertescha era fans da crimi creschids, cumbinescha Gianna Duschletta tensiun cun atmosfera locala ed ina lingua viva – in mix che fascinescha fin a l’ultima pagina.

La prelecziun ha lieu per rumantsch. Preschentaziun e discussiun cun Gianna Duschletta, moderaziun: Karin Kohler-Pattis, Chasa Editura Rumantscha.